Өндөг шиг л болчих хэрэгтэй юм шиг...

Би өндөг идэх дуртай.

Идэх идэхдээ чанаж биш шарж идэх дуртай.

Өндөг маш олон амин дэм агуулдаг. Бүр, хүн өдөрт нэгийг идвэл эрүүл мэндэд тустай ч гэдэг.

Гаднаасаа ихэвчлэн цагаан өнгөтэй, зарим нь шар өнгөтэй харагддаг. Тэр өнгө бүрийн цаана нэг л амт байдаг. Харин идэхдээ яаж болгож хэрэглэж байгаагаас амт нь өөр өөр.

Тэр ч байтугай түүхий өндөгний доторх шараар нь үс болон арьсандаа тэжээл өгдөг гээч.

Гэсэн ч хүмүүс аливаа алдаа мадаг гаргадаггүй, их сайн гэсэн хүнээ өндөг шиг өөгүй хүн гэж тодотгодог.

Учир нь өндөг гаднаасаа гөлгөр, гөлчгөр их л гоё цэвэрхэн. Харин гадны ямар нэгэн нөлөөнөөс болж өндөг энэ чанараа алддаг. Ялангуяа, түүний эзэн хэрэгчдийн нөлөөнөөс.

Үүний адил аливаа байгууллага, компанийн үйл ажиллагаа өндөг шиг өөгүй байх уу?, аль эсвэл сайн уу?, бүр агуу байх эсэх нь тэдний удирдагчдаас шалтгаалдаг гэж Жим Колленз “Сайнаас аагууд дэвшихүй” номондоо хэд хэдэн удаагийн давтамжтай судалгаанаасаа дүгнэсэн байдаг.

Өндөг хэзээ ч өөрийгөө би өөгүй, гоё гэж хэлдэггүй.

Яаж хэлэх юм бэ? Гэж та бодож магадгүй.

Учир нь энэ төсөөлөл гэдгийг мартуузай.

Үүний адил тэр агууд хүрсэн удирдагчид хэзээ ч өөрсдийгөө агуу гэдгээ зарладаггүй. Бүр ч эсрэгээрээ нуудаг. Тэдний чадвар, мэдлэг, давуу тал бүгд тэр цагаан, шар хальсан дотор л нуугдаж байдаг.

Хагалахаас нааш ил гарч ирэхгүй. Гагцхүү хагарахдаа хатуу.

Яг одоо миний өмнө нэг ширхэг цагаан өндөг байна л даа.

Дүмбийчээд л, нэг л чимээгүй тайван бас их цэвэрхэн. Магадгүй дээд зэрэглэлийн ёс зүйтэй нэгэн дүмбийгээд суугаад байх шиг.

Нэг бол хорон санаатай, дотроо бүхнээ нуусан баг зүүсэн нэгэн ч юм шиг. Бүр айх шиг...

Тийм ээ, дэлхийн хэмжээнд хавтгайрч үйл ажиллагаагаа явуулж буй компаниудын агуу удирдагчдаас тэдний өрсөлдөгчид, тодруулбал хараахан агуу гэх категорыг биетжүүлж чадаагүй сайн удирдагчид энэ л мэдрэмжийг мэдэрдэг байх.

Тэгэхээр хүн амьдралдаа хаана ч, хэзээ ч, хэнтэй ч бай хүнийхээ хувьд төдийгүй эрхэлж буй ажил төрлийнхөө хувьд өндөг шиг л болчих хэрэгтэй юм шиг.

Тийм ээ, би өндөг идэх дуртай.

Гэхдээ, яг өндөг биш, зүгээр л өндөг шиг л болчих юм сан.

Харин та, болмооргүй байна уу?